ឆ្កួត

០១.ឆ្កួតនឹងគ្រឿងញៀន..កញ្ឆាអាភៀន...អេរ៉ូអ៊ីនដុំក្រាក់
គ្រាប់អិចស្តាហ្ស៊ី....គីមីផ្សំដាក់...ឱយកឹកញៀនជាក់
.ធ្លាក់ខ្លួនវេទនា។
២.កឹកគ្រឿងញៀនហើយ..ព្យាបាលឥតស្បើយ..អ្នកអឺយខ្លោចផ្សា
ធ្វើបាបម៉ែឪ....អាស្រូវឫស្យា.....លួចលុយគ្រួសារ
...........ទិញណា៎គ្រឿងញៀន។
៣.សូមកុំសាកល្បង....សាកជាប់ចំណង.....តែម្ដងកល្យាណ
ឱយអ្នកវង្វែង......ចំបែងស្គមប្រាណ......អត់វាមិនបាន
...........ខូចប្រាណអាត្មា។
៤.ញៀនអាភៀនហើយ....លក់មិនសល់ឡើយ....ទ្រព្យអឺយអត្តា
យកទិញគ្រឿងញៀន.....អាភៀនកញ្ឆា....ម៉្សៅគ្រាប់យ៉ាបា
......អិចស្តាហ្សីគ្រប់យ៉ាង។
៥.ឆ្កួតនឹងសុរា.....ស្រវឹងកាលណា.....ល៉ូឡាអួតអាង
តាំងឈ្លោះប្រកែក....ហួរហែកផូងផាង.....លុះដល់ពេលស្វាង
.......សងខាងឈឺផ្សា។
៦.សុរាខ្លាំងពិត...ផឹកប្រើគំនិត្យ.....ផឹកគិតអត្តា
ផឹកឱយឆ្ងាញ់បាយ....ទើបកាយអាត្មា.....ផុតទុក្ខសុខា
.......នេះស្រា!ចាំទៅ។
៧.ឆ្កួតនឹងប៉ោបៀ....អបាយពាលា.....ជាភពអាស្រូវ
បើញៀនល្បែងហើយ....អ្នកអឺយចាំទៅ....ជំពាក់ញាតិផៅ
......ចាំទៅក្មេងចាស់។
៨.សូមកុំប្រព្រឹត្ត.....បានលេងញៀនពិត....ត្រូវគិតឱយច្បាស់
ចាញ់អស់លុយហើយ...ទុក្ខអឺយធ្ងន់ណាស់. .បញ្ចាំ.លក់មាស
........កេរ្តិ៍ផ្ទះលក់ដី។
៩.ឆ្កួតវង្វែងស្នេហ៍....ខ្វល់ខ្វាយឥតល្ហែ....គិតតែចរណៃ
បានជួបវល្លភៈ....វង់ភក្ត្រស្រីថ្លៃ....ចិត្តរំភើបក្រៃ
......ភ្លេចក្ដីទុក្ខា។
១០.ឆ្កួតស្រឡាញ់ស្រី....ស្មោះត្រង់ភក្ដី.....ដល់ថ្ងៃប្រេះឆា
កើតទុក្ខកង្វល់.....ខ្វាយខ្វល់ចិន្ដា....ឆ្កួតនឹងស្នេហា
......ឱរាស្គាំងស្គម។
១១.ឆ្កួតនឹងដុល្លា...មន្ត្រីរាជការ....ប្រឹងណា៎ស៊ីបូម
លក់ដីឱយយួន....ជាតិខ្លួនទ្រុឌទ្រោម.. .យួនចេះលួងលោម
.......ខ្មែរទ្រោមឱរា។
១២.លក់ដីព្រៃឈើ .....ពួកមន្ត្រីភ្លើ .... .ភ្នែកមើ!ដុល្លា
លក់សញ្ជាតិខ្មែរ...ឱយគេដែរណា៎...យួនមកកម្ពុជា
......ប្រជាអស់ដី។
១៣.លោកមានដុល្លា..លោកនឹងក្លាយជា...ប្រជាអត់ដី
រស់ដូចខ្មែរក្រោម...ខំបូមទៅថ្លៃ....រស់អត់បុរី
......ដូចដីចំប៉ា។
១៤.មានសាសន៍ជាខ្មែរ....រស់លើដីខ្មែរ....ជាតិគេត្រួតត្រា
មើលន៎!ខ្មែរក្រោម....ទ្រុឌទ្រោមឱរា.....បាត់ជាតិសាសនា
......ទុក្ខារាល់ថ្ងៃ។
១៥.បន្ទាយលង្វែក....រលាយបាក់បែក ..កាប់វែករកអ្វី?(រកប្រាក់ដួង)
ខ្មែរបានកាប់ពាយ....បន្ទាយឫស្សី.....សៀមយកបុរី
.....ដោយសារអ្វី!ប្រាក់ដួង!!!៕
តែងនូវឆ្នាំ២០០២

ហង្ស

១.ហង្សមានមាសប្រាក់........យកទិញបុណ្យស័ក្ដិ.......បានពាក់លើស្មា
មិនអាចទិញចិត្ត.............ញាតិមិត្តគ្រប់គ្នា...........ឱយគេស្នេហា
..........................អត្តាបានអី។
២.ប្រាក់អាចទិញមាស..........ទិញពេជស្អេកស្កាស់........ឥតខ្វះអ្វីទេ
រីឯទុក្ខសោក...............ប្រាក់ថោកទាបទ្វេ.......ប្រាក់ទិញបានទេ
..........................ក្ដីស្នេហ៍ក្ដីស្លាប់។
៣.មានប្រាក់សាងសង់..........អាគារសំណង់.............ផូរផង់គួរគាប់
ទុកជាស្នាដៃ................សក្ខីជាប់លាប់.....កេរិ៍្តឈ្មោះអឺងអ័ព្ទ
..........................បានរាប់រយឆ្នាំ។
៤.ជាវបដិមាករ..............ថ្វាយជាកាដូ............ជាថ្នូរលាងកម្ម
សងគុណមេបា...............គ្រប់គ្នាចងចាំ............ដែលគាត់ថែទាំ
..........................ទំរាំអ្នកធំ។
៥.ជួយដោយស្មោះស្ម័គ្រ...មានឈ្មោះអមតៈ...ឈ្មោះអ្នកឧត្តម
ញាតិកោតសរសើរ...........បានធ្វើបុណ្យធំ.........ជួយដល់សង្គម
..........................គុណធំវេហារ។
៦.ហង្សមានស្ដុកស្ដម្ភ.....ឥតជួយឧបត្ថម............សង្គមប្រជា
មិនធ្វើអ្វីមួយ...............លើកស្ទួយសាសនា...នោះឈ្មោះអត្តា
.........................បាត់ណា៎សាបសូន្យ។
៧.ហង្សមានស្ដុកស្ដម្ភ....បានជួយឧបត្ថម.......សង្គមជាតិខ្លួន
អ្នកបានល្បីឈ្មោះ........កិត្តិយសសមសួន......ជួយញាតិបងប្អូន
.........................ជីដូនជីតា។
៨.ប្រាក់រាប់មិនអស់...........ស្លាប់ទៅឥតឈ្មោះ...កិត្តយសមេបា
រស់បានមួយជាតិ.............ឆ្លៀតជួយសាសនា..ឱយមានឈ្មោះចារ
.........................ក្នុងសាវតាខ្មែរ។
៩.សូមហង្សកុំភ្លេច........មាសប្រាក់ត្បូងពេជ......រំលេចល្អទ្វេ
អ្នកផងសរសើរ.............មកលើហង្សដែរ........ជនពាលក៏ស្នេហ៍
.........................រិះរេឥស្សា។
១០.ទ្រព្យធនឧរ៉ៃ............ត្បូងពេជចរណៃ........ឱយភ័យទោសា
ជនពាលពេញចិត្ត............រិះគិតនិន្ទា...........ហើយតាមផ្ដន្ទា
.........................អាត្មាហ្មងសៅ។
១១.ទ្រព្យច្រើនអនេក........ហង្សរស់ជិតក្អែក....បើកភ្នែកមើលទៅ
ហង្សល្អឆើតឆាយ..........ក្អែកកាយចិត្តខ្មៅ.......ដល់វាម៉ួម៉ៅ
.........................ហង្សត្រូវវិនាស។
១២.ហង្សគួរបែងចែក........ទុកឱយហ្វូងក្អែក........មានមែកទំខ្លះ
ប្រយ័ត្នក្អែកខឹង...........វាហ្នឹងចឹកច្រាស់......ហង្សត្រូវព្រាត់ប្រាស់
........................វិនាសអន្តរាយ។
១៣.ហង្សត្រូវចេះរស់........មានចិត្តសន្ដោស......ដូរដោះចិត្តកាយ
ដោយចែកក្អែករស់.........គេស្មោះពណ្ណរាយ...ហង្សអាចផ្ញើកាយ
........................ជានាយក្អែកបាន។
១៤.ហង្សមានសប្បុរស.....ជួយឱយក្អែករស់....ហង្សរស់ក្សេមក្សាន្ត
ហង្សជួយរំលេក...........ឱយក្អែករស់រាន.......ហង្សនឹងសុខសាន្ត
........................ហើយបានសោភា។
១៥.ក្អែករស់ស្រណុក.......ក្អែកស៊ូទូទុក្ខ............ឈមមុខការពារ
ស្មោះស្ម័គ្រដើម្បី........ហង្សថ្លៃសក្ដា..........ហង្សមានឧមា
........................មេធាជាខ្នង៕
តែងនូវឆ្នាំ២០០៥

ឱនកាយប្រណម្

១.កូនចៅជួបជុំ...ឱនកាយប្រណម.....បង្គំពុកម៉ែ
សុំខមាលទោស...នូវទោសច្រើនទ្វេ....មកពីបំពេ
...............ពុកម៉ែកូនអឺយ។
២.បុត្រទាំងស្រីប្រុស..សំដីទ្រគោះ..........គំរោះគំរើយ
សូមលោកអភ័យ..ទោសពៃរ៍កូនអឺយ.សូមលោកធូរស្បើយ
...............ជួបអឺយសុខា។
៣.ពុកម៉ែប្រឹងប្រែង..កាប់គាស់លីសែង......ចំបែងចិន្ដា
ប្រឹងធ្វើព្រោះកូន..បុត្រស្ងួនគ្រប់គ្នា..សូមសុខសោភា
...............មានណា៎ដល់លោក។
៤.លោកអ្នកមានគុណ..ប្រឹងប្រែងរែកពុន..ពីមុននោះមក
កូននៅតូចង៉ា....លុះត្រាធំស្ដូក.....កូនជូនពរលោក
...............ផុតសោកទុក្ខភ័យ។
៥.ថ្ងៃនេះទៅមុខ..សូមលោកស្រណុក..បានសុខសិរី
មានអាយុវែង......អង្វែងយូរក្រៃ......ជួបជុំបុត្រថ្លៃ
.............ដោយក្ដីរម្យនា។
៦.គុណលោកធំណាស់..កូនបួងសួងព្រះ..ជាម្ចាស់ថ្លៃថ្លា
សូមព្រះពុទ្ធអង្គ.....ព្រះសង្ឃទេវតា.......ជួយថែរក្សា
...............មេបាយើងខ្ញុំ។
៧.កូនជូនមគ្គផល..កងបុណ្យកុសល..មង្គលសុខុម
មានដល់ពុកម៉ែ......ដែលថែអបរុំ........កូនតូចក្រពុំ
...............លុះធំក្ដីណា។
៨.កូនចៅទាំងអស់..បំរើស្ម័គ្រស្មោះ.....ចំពោះមេបា
បើមានជាតិក្រោយ..ឱយកូនប្រាថ្នា..ជួបលោកគ្រប់គ្នា
...............ដូចជាសព្វថ្ងៃ៕

ម្ដាយចាស់

១.ហៃអស់កូនស្ងួន...មកជិតម្ដាយខ្លួន...នឹមនួនផ្ទៀងស្ដាប់
ម្ដាយអធិប្បាយ.....និយាយរាប់ប្រាប់.........ឱយអ្នកត្រងត្រាប់
....................សណ្ដាប់ពាក្យម្ដាយ។
២.ទាន់ម្ដាយនៅរស់..សូមកូនទាំងអស់...ស្ម័គ្រស្មោះចិត្តកាយ ជួយថែរក្សា.........មេបាគ្រប់កាយ............ហុចចំណីបាយ
...................កុំណាយណា៎ស្ងួន។
៣.ម្ដាយចាស់ពេកកូវ...សម្ដីឡាចៅ..........មួម៉ៅខុសក្បួន សូមអស់កូនចៅ......ទ្រាំទៅមាសស្ងួន........មិនយូរទេកូន
..................ម្ដាយសូន្យសង្ខារ។
៤.លោកទន់លេះលោះ..សូមកូនស្រណោះ......អាលោះមេបា ជួយច្របាច់គក់..........ជូតបក់កាយា...........ក្រែងលោមេបា
...................រស់ណា៎បានយូរ។
៥.ជីវិតម្ដាយរស់......កូនកុំខឹងឈ្លោះ........បោកបោះរអ៊ូ កូនកុំមាក់ងាយ........ខឹងម្ដាយទ្រឹស្ដស្មូរ......មិនគិតម្ដាយក្រ
...................ត្រដរអត់ឃ្លាន។
៦.ចិត្តមនុស្សចាស់...ខឹងឆាប់រហ័ស.............ក្រឡាស់បំពាន ជជេសទទឹង..........រកពឹងមិនបាន..........ជួនចិត្តសាមាន្យ
...................រំខានកូនទ្វេ។
៧.ចិត្តមនុស្សចាស់...ងង៉ក់ឆាប់ណាស់............រហ័សយុំដែរ
ដូច្នេះត្រូវកូន........បុត្រស្ងួនខំថែ...........ថ្នាក់ថ្នមបំពេរ
..................ពុកម៉ែកុំល្អាន។
៨.កុំឱយហួសពេល....ចាស់លោកដំណែល.........ច្រំដែលកល្យាណ មេបាស្លាប់ទៅ.....កូនចៅគ្រប់ប្រាណ.........ស្រែកយុំបោកប្រាណ
..................ស្ដាយខានតបស្នង។
៩.កូនធ្វើចំពោះ.....ម្ដាយដែលនៅរស់....ល្អមោះហ្មត់ហ្មង កុំចាំម្ដាយស្លាប់....យុំប្រាប់ញាតិផង...........មិនទាន់បានសង
..................ចំណងគុណអើយ។
១០.លុយកាក់ចំណី....ទោះតិចតួចក្ដី................ជូនថ្លៃម៉ែអឺយ នេះក្ដីដឹងគុណ.......ដ៏ធ្ងន់កូនអ្ហើយ.............កូនឆ្លងដល់ត្រើយ
..................កេរ្តិ៍អើយឈ្មោះល្អ។
១១.មេបាស្លាប់ទៅ..កិត្តិយសម្ដាយនៅ......កូនចៅធ្វើល្អ
ញាតិផងសរសើរ.......ល្បីឮខ្ទារខ្ទ័រ........កូនចិត្តស្មោះស
..................បវរថ្លាថ្លៃ។
១២.ចៅមើលបំណាំ...កូនត្រូវចងចាំ..........បណ្ដាំម្ដាយថ្លៃ
កូនថែម្ដាយល្អ.....ចៅក៏ថែថ្លៃ...........ដូចកូនប្រុសស្រី
.................ព្រួតដៃជួយម្ដាយ។
១៣.ឥល៉ូវដល់ហើយ...កូនកុំកន្តើយ........ជួយអឺយដោះស្រាយ ឱយរូបមេបា........ផុតណាអន្តរាយ.......កុំគឹតសោកស្ដាយ
.................ជួយម្ដាយឪពុក។
១៤.មេបាស្លាប់ទៅ.កូនចៅរស់នៅ........អ្នកត្រូវកាន់ទុក្ខ ឱយបានយូរខែ......ចាំទេទៅមុខ..............សែនជូនម៉ែពុក
.................សុំសុខសិរី។
១៥.ព្រលឹងមេបា......តាមថែរក្សា..................បុត្រាបុត្រី អ្នកប្រព្រឹត្តិល្អ.....ស្មោះសប្រពៃ........អ្នកជួបជោកជ័យ
..................សិរីមង្គល៕

ប៉ោបៀ

១.ចាស់ទុំប្រដៅ.....ប្រាប់ដល់ញាតិផៅ...កូនចៅគ្រប់គ្នា
កុំប្រព្រឹត្តិល្បែង.....រមែងពំនៀរ..........អបាយពាលា
..................ពុំងារញៀនក្រៃ។
២.អ្នកញៀននឹងបៀ.មិនងាយដកឃ្លា........ពីវាបានអី
ចាញ់អស់លុយកាក់.....ធ្លាក់ខ្លួនក្រក្រី..ញាតិមាក់ងាយក្រៃ
...................អត់អីទិញស៊ី។
៣.ចាញ់បៀអស់លុយ..ក្រាញនៅអង្គុយ...មុខស្អុយវក់វី
តាំងដោះបញ្ចាំ......អង្កាំវជីរ..........យកចាក់មេស៊ី
...................អស់ពីដៃទៀត។
៤.ដល់ផ្ទះមួម៉ៅ....ខឹងជេរកូនចៅ...ចែកផ្លូវព្រោងព្រាត
ថុញថប់ដង្ហើម....លីមលើមលបឆ្លៀត.រកលុយលេងទៀត
................ចោលម្សៀតចាញ់គេ។
៥.ថ្ងៃនេះបានឈ្នះ...ចិត្តអររូតរះ........ទិញមាសជាកេរ្តិ៍
ថ្ងៃក្រោយចាញ់វិញ...ទោរម្នេញខ្ចីគេ..លក់មាសលក់កេរ្តិ៍
....................ឪម៉ែចែករ៉ា។
៦.អង្គុយព័ទ្ធវង់......ខ្លះលុតជង្គង់.ជាកង់ខ្ញៀវខ្ញារ
ដណ្ដើមកាច់លុយ......ប្រថុយដាក់ផា........ចាវខាងលើណា៎
/>....................គិតថាអញគ្រាន់។
៧.ស្ដាប់សូរមោះមុត...ចាក់ធំសុំអ៊ុត.......ក្រាបលុតរូសរាន់
ឈ្ងោកមើលអាប៉ោង..ទំនងឥតភាន់...អ៊ុតឃើញស្រែកលាន់
....................អញគ្រាន់បើវើយ។
៨.បានឈ្នះតែម្ដង....ចាញ់បីបួនដង....បូកសងឃើញហើយ
លទ្ធផលបញ្ចប់......ចាញ់កប់ក្ដោងអឺយ...រើមិនរួចឡើយ
....................អញអ្ហើយហ្មត់ប្រាក់។
៩.អាប៉ោងប្រើល្បិច....អេឡិចទ្រនិច.......ឱយគេចស៊ីប្រាក់
កូនស្ដាប់ច្បាស់សូរ.លោតហ៊ោទៅចាក់.ដល់អ៊ុតស្រែកភ្ញាក់
....................ស៊ីប្រាក់អស់ទៀត។
១០.អស់លុយមិញមុញ...គំនិត្យគិតសុញ...អែសអុញសួរញាតិ
អង្វរខ្ចីលុយ........ប្រថុយចាក់ទៀត.....ក្រែងមានមាយាទ
....................សូកសៀតឈ្នះវិញ។
១១.ញាតិឱយខ្ចីប្រាក់..បានលុយលោតដាក់..ចាក់យកឈ្នះវិញ
បើកឡើងមេឆី......អ្នកថ្លៃទោរម្នេញ..អស់លុយមុខស្ញេញ
...................បញ្ចេញក្ដីទុក្ខ។
១២.បៀកូនក្រមុំ........បានលេងទុក្ខធំ.........ចាស់ទុំទំនុក
មយដាក់អន្ទាក់........កៀងអ្នកចូលតុ...បោកស៊ីលុយខ្មុក
.....................ចាំទុកកល្យាណ។
១៣.ល្បែងគ្រប់ជំពូក..លេងភ្នាល់ឆបោក..ទាបថោកសាមាន្យ
ជៀសវាងកុំលេង......ល្បែងឱយខូចប្រាណ..មិនចេះកល្យាណ
.....................សុខសាន្តប្រិមប្រិយ។
១៤.ល្បែងឱយអ្នកញៀន.សឹងដូចអាភៀន.....កុំរៀនលេងអី
អ្នកចេះល្បែងហើយ.....ថ្លៃអ្ហើយរីងរៃ.......ប្រាក់កាស់ឧរៃ
.....................នៅដៃគេអស់។
១៥.គ្រប់ល្បែងប៉ោបៀ..ប្រើល្បិចស៊ីគ្នា..មិត្តភ្ងាឥតស្មោះ
ជីវភាពកម្មក្រាស់...ប្រាក់កាស់ហ្មត់អស់..អ័ព្ទទាំងកេរ្តិ៍ឈ្មោះ
......................កិត្តិយសគ្រួសារ។
១៦.សូមខ្មែរប្រុសស្រី.....លះបង់សព្វអ្វី......អប្រិយឫស្យា
មានវារុណី..............រមណីបេស្យា.....អាភៀនកញ្ឆា
......................ប៉ោបៀទាំងពួង៕

គ្រឿងញៀន

១.កញ្ឆាអាភៀន..សុទ្ធជាគ្រឿងញៀន..សាមាន្យឫស្យា
បានសាកល្បងហើយ..អ្នកអើយគ្រប់គ្នា....មិនអាចដកឃ្លា
..................ពីវាបានអី។
២.ម៉ារីរ៉ូវ៉ាណា.......ក៏ជាកញ្ឆា.......កាចសាហាវដែរ
កុំយកខ្លួនបៀត.ផ្លាត់ស្នៀតជឿគេ.គ្រឿងញៀនដឹងទេ
.................កូនខ្មែរគ្រប់គ្នា។
៣.អំហ្វេតាមីន......ម៉្សៅកូកាអ៊ីន....អេរ៉ូអ៊ីនយ៉ាម៉ា
សុទ្ធជាគ្រឿងញៀន..សាមាន្យឫស្យា..សូមកុំសាកវា
.................បុត្រភ្ងាប្រុសស្រី។
៤.កឹកគ្រឿងញៀនហើយ..អ្នកឥតធូរស្បើយ..ខ្លួនអើយរីងរៃ
លក់អស់មរដក......កុហករាល់ថ្ងៃ.........ជួនលួចដើម្បី
................ទិញវ៉ីគ្រឿងញៀន។
៥.លះបង់សាលា...បោះបង់កិច្ចការ..ដោយសារគ្រឿងញៀន
អ្នកស្គាល់តែទុក្ខ..ទំនុកស្រេកឃ្លាន..នេះហើយគ្រឿងញៀន
..................ឱយប្រាណថ្លោះធ្លោយ។
៦.សូមកុំសាកល្បង...សាកជាប់ចំណង......មួយដងក៏ដោយ
កុំភ្លក់ឱយសោះ..ជាគ្រោះថ្លោះថ្លយ..តិចតួចក៏ដោយ
..................នាំឱយញៀនបាន។
៧.ទោះបីមិត្តភក្ដិ..បង្ខំឱយអ្នក....ជក់ចាក់គ្រឿងញៀន
សូមកុំសាកល្បង.....តែម្ដងក៏ញៀន...នេះហើយអាភៀន
..................ឲ្យញៀនជាក់ច្បាស់។
៨.គ្រាប់អិចស្តាហ្ស៊ី..លេបមួយឬពីរ.....ឃើញមីរដេរដាស់
ឱយអ្នកវង្វែង......រាំលេងតែផ្ដាស់....ជួនប្រកាច់ស្ទះ
.................អ្នកខ្លះមរណា។
៩.សូមកុំសេពគប់....គ្រឿងញៀនគ្រប់មុខ..ជាភពឫស្យា
ហិនហោចប្រាក់កាស់..កម្មក្រាស់អាត្មា....ព្យាបាលមិនជា
..................គ្រូសាររីងរៃ។
១០.ហិតកាវកល្យាណ..បំបាត់ស្រេកឃ្លាន..ឱយញៀនរាល់ថ្ងៃ
សូមកុំហិតវា.........បុត្រភ្ងាប្រុសស្រី.....គ្រឿងញៀនអប្រិយ
..................រីងរៃកាយា។
១១.ការងារជាប្រាក់....ត្រូវខំប្រចក្ស.......ទើបអ្នកក្លាយជា
សុជនត្រឹមត្រូវ.......គេចផ្លូវពាលា.......រស់នៅរម្យនា
.................នៅនាលោកិយ។
១២.យើងជាមនុស្ស..តែងមានទុក្ខទោស..កំហុសទីទៃ
មិនត្រូវសេពគប់......លង់ងុបនូវអ្វី.....ដែលឱយទោសពៃរ៍
.................ដល់ថ្លៃគ្រប់គ្នា។
១៣.គ្រឿងញៀនសព្វគ្រប់..វាជាប្រភព...ឱយឡប់អាត្មា
ឯវារុណី...........រមណីពេស្យា......គេចឆ្ងាយពុំងារ
................ទាំងបៀប៉ោផង។
១៤.ចាស់ទុំប្រដៅ..ប្រាប់ដល់កូនចៅ...គេចផ្លូវយង់ឃ្នង
ឈ្លោះត្រឹមសំដី...ឈ្លាសវៃកន្លង..ឈ្លោះវ៉ៃសំពង
.................អ្នករងទុក្ខា។
១៥.ឈ្លោះជេរវ៉ៃតប់..ឃាតកម្មសព្វគ្រប់..ជាភពពាលា
ក្លាយជាទម្លាប់.....ញៀនជាប់អាត្មា...ត្រូវលះបង់វា
...................បុត្រភ្ងាប្រុសស្រី៕

ធ្វើបុណ្យ

១.ធ្វើបុណ្យឱយទាន......ឥតគិតប្រមាន......ថាប្រាណក្រក្រី
ខ្ចីប្រាក់នាយទុន..........ធ្វើបុណ្យសុំជ័យ...មានដល់អ្នកថ្លៃ
......................នេះក្ដីភ្លើតភ្លើន។
២.ធនធានតិចសោះ..ធ្វើបុណ្យដោយស្មោះ..ទានទោះតិចច្រើន
ស្ងប់រំងាប់ចិត្ត......ឥតគិតភ្លើតភ្លើន.......ចង់បានលាភកើន
..................រាប់ម៉ឺនសែនលាន។
៣.ធ្វើបុណ្យសាងបាប....ចិត្តមិនសុភាព...សុំលាភដល់ប្រាណ
ធ្វើបុណ្យរិចតួច.........សុំរួចបាបឋាន.......ប្រាថ្នានិព្វាន
.....................ដល់ប្រាណនួនល្អង។
៤.ធ្វើបុណ្យលាងបាប....អ្នកគួរតែជ្រាប....ដ៏រាបទៅផង
ជីវិតរាល់ថ្ងៃ...........ធ្វើអ្វីមានឆ្គង.....ជួនខឹងយង់ឃ្នង
.....................ឌឺដងញាតកា។
៥.ធ្វើល្អប៉ុន្មាន.......អាក្រក់ប៉ុន្មាន......បូកបានសងគ្នា
ដកជួបនរក............លាមកមាគ៌ា.......បូកជួបសួគ៌ា
....................ជ្រាបណា៎គ្រប់ជន។
៦.ធ្វើបុណ្យចង់បាន....ចំណេញធនធាន.....អុជទានធូបបន់
បានលុយទុកចាយ.......សប្បាយលោភលន់..ឱយបថុជ្ជន
....................រិះគន់មុសា។
៧.សាបព្រោះគិតផល...មិនថែលទ្ធផល....បានដល់អាត្មា
ធ្វើបុណ្យគិតដល់......មគ្គផលសុខា......មិនសុរក្ខា
...................អាត្មាហ្មងសៅ។
៨.ធ្វើបុណ្យបញ្ជូន...ដល់ញាតិបងប្អូន...ជីដូនម៉ែឪ
ដែលគាត់គ្រប់ប្រាណ..ចាកឋានលោកទៅ..ផុតទុក្ខហ្មងសៅ
...................ជួបនៅសុខា។
៩.ចង់ទៅនិព្វាន....មិនរៀបខ្លួនប្រាណ..ឱយមានវិភា
ចង់ទៅឋានសួគ៌.....អ្នកគួរឧស្សាហ៍.....ធ្វើសុរក្សា
.................មេធាជាខ្នង។
១០.ទាយកទាយិកា...កាន់ពុទ្ធសាសនា....ធ្វើណា៎ខុសឆ្គង
បានអ្វីតម្រង់.......គ្រូសង្គ្រាជម្ដង.....ឃើញនេនរំលោង
.................បែរខ្នងធ្វើហី។
១១.អ្នកត្រូវដឹងគុណ..មេបាជាមុន.......បានបុណ្យប្រពៃ
រួចហើយសាងសង់.....សំណង់ចេតិយ....ឧទ្ទិសដល់ថ្លៃ
..................ស្នាដៃបុត្រភ្ងា។
១២.ធ្វើទានដោយស្មោះ..លោកមានកិត្តិយស..ល្បីឈ្មោះខ្ទ័រខ្ទារ
សង់គិលានដ្ឋាន......ឆទានសាលា.......ជូនញាតិប្រើការ
...................ទុកជាសក្ខី។
១៣.ជាវបដិមា........សង់កុដ្ឋិសាលា....វិហារចេតិយ
ជាវស្បង់ជីពរ........ឬក៏បច្ច័យ........ប្រគេនសង្ឃថ្លៃ
...................ដើម្បីជាទាន។
១៤.សម្បទានទាំងឡាយ..ទានដោយរីករាយ..មិនងាយធ្វើបាន
អ្នកមានកិត្តិយស......ក៏ព្រោះធ្វើទាន...ជួយតាមខ្លួនមាន
....................អ្នកបានសោភា។
១៥.សប្បុរិសទាន......បានទៅនិព្វាន....ឬឋានសួគ៌ា
ឯឋាននរក...........លាមកមាគ៌ា.....តាមចងកម្មពៀរ
...................អសាធុជន៕

ទំនួញមេបា

១.កូនមាសពន្លក.....មេបាប្រឹងរក.........ទុក្ខសោកវេទនា
ទោះបីភ្លៀងខ្យល់..វិលវល់ខ្លាំងខ្លា........ដើម្បីគ្រួសារ
...................ភោក្ដារាល់ថ្ងៃ។
២.រហូតកូនធំ.........ពុកម៉ែខិតខំ.................អបរុំពិសី
ជួនកូនព្រងើយ........កន្តើយធ្វើហី..........ធ្វើតាមចិត្តថ្លៃ
...................ឥតក្ដីមេត្តា។
៣.ពុកម៉ែទូន្មាន......ប្រដៅកល្យាណ.......ឱយរៀនវិជ្ជា តែមាសព្រលឹង........ខឹងហ្នឹងមេបា...........លះបង់សាលា
..................អត្តាល្ង់ខ្លៅ។
៤.កូនអវិជ្ជា.........ដល់ឱយធ្វើការ............ភក្ត្រាក្រញ៉ូវ គឹតថាលំបាក.........គេចគ្រាកខុសផ្លូវ.........នាំភាពអាស្រូវ
...................ដល់ឪពុកម៉ែ។
៥.កូនដើរសប្បាយ....ឥតគិតអ្នកម្ដាយ....នឿយនាយឥតល្ហែ ប្រឹងប្រែងសន្សំ......ឧបត្ថមមាសមេ.........ទោះកូនឡប់ឡែ
..................ពុកម៉ែទទួល។
៦.ដល់មេបាឈឺ......ពឹងកូនឱយធ្វើ..............ដូចដើរឡើងទួល ជួនកូនបោះបោក...គំហោកឆាបឆួល......ប្រៀបដូចជាឈ្នួល
..................អ្នកជួលថៅកែ។
៧.មេជីតែមួយ.......ចិញ្ចឹមលើកស្ទួយ........ផ្ទុកជួយទាល់តែ មានគូស្រករ.........កូនក៏បែកបែរ................ចេញពីពុកម៉ែ
.................អ្នកមេគិតថ្លៃ។
៨.មេបាប្រសព្វ......ចិញ្ចឹមកូនដប់...........ជួបគ្រប់ទុក្ខភ័យ កូនធំរស់រាន........មានប្រពន្ធប្ដី..............បែកនៅទីទៃ
................ជួយស្អីម៉ែបាន?។
៩.កូនសម្លាញ់អឺយ..កុំនៅព្រងើយ...........កន្តើយកល្យាណ កូនគិតគ្នាន់គ្នេរ....ទាន់ម៉ែរស់រាន..........ដល់លោកចែកឋាន ................កល្យាណស្ដាយក្រោយ។
១០.មេបាជរា......រស់នៅឯកា...........​ភ្លេចណា៎មុខក្រោយ ជួនកូនបន្ទោស...ទ្រគោះបោះឱយ........កូនអឺយកុំធ្លោយ
................នាំឱយមានពៀរ។
១១.បើកូនធ្វើល្អ...ពុកម៉ែត្រេកអរ...............ជូនពរស្ងួនភ្ងា
ស្គាល់តែសុខុម....សុខដុមរម្យនា.................ធ្វើសុរក្សា
................គ្រួសារថ្កើងថ្កាន។
១២.កូនជំពាក់គុណ..មេបាពេកពន់...............សងគុណមិនបាន កូនត្រូវសាងល្អ....ព្រះធម៌ជាយាន...............ខន្តីជាស្ពាន
.................រកឋានផុតទុក្ខ។
១៣.កូនចៅប្រុសស្រី..កុំគិតខាតអី.................ចំណីចំណុក
ធ្វើសែនដូនតា........មេបាចាស់ស្រុក.............កុំនៅអែអុក
..................ចាំទុកគ្រប់គ្នា។
១៤.ត្រូវសែនរាល់ឆ្នាំ..កូនចៅចងចាំ...........បណ្ដាំនេះណា៎
ទោះមានស្ដួចស្ដើង...ទោះថ្កើងវេហារ....ត្រូវឆ្លៀតគ្រប់គ្នា
...................បុត្រភ្ងាប្រុសស្រី។
១៥.ដឹងគុណមេបា.....សងគុណដូនតា..........គ្រូបាចារ្យថ្លៃ អ្នកបានមគ្គផល....មង្គលសិរី..........ជៀសផុតទោសពៃរិ៍
..................បុត្រថ្លៃគ្រប់គ្នា៕

ខ្មែរសម្លាប់ខ្មែរ

១.ខ្មែរសម្លាប់ខមែរ...ទុកដីទំនេរ..........សាសន៍គេមកនៅ ជំនួសរាស្ត្រខ្មែរ......ដែលគេស្លាប់ទៅ...សូមជ្រាបពាលពៅ
...................ញាតិផៅគ្រប់គ្នា។
២.កុំជឿទ្រឹស្ដី......បរទេសអប្រិយ............ចង្រៃឫស្យា
គេបង្វក់ខ្មែរ.........ដឹងទេពុំងារ..........ឱយខ្មែរជល់គ្នា
...................ពាធាគ្នាឯង។
៣.អ្នកធំដែលឈ្នះ...សូមកុំមានះ..........ព្រលះសាសន៍ឯង នាំឱយបរេទស.......ស៊ីតេះដីលេង.........យូរទៅហ្មត់ធេង
..................ខ្មែរឯងអស់ដី។
៤.លោកអ្នករដ្ឋការ..រថយន្តសង្ហារ..............វីឡាស្កឹមស្កៃ ប្រៀបដូចជាហង្ស....ល្អខ្ញង់ប្រិមប្រិយ............អនាគតអ្នកថ្លៃ
..................អស់ដីជាតិសាសន៍។
៥.លោកមានបុណ្យស័ក្ដិ.ជាតិលោកអបលក្ខណ៍.គ្រោះថ្នាក់កម្មក្រាស់
ដូចជាចំប៉ា...........បាត់ណា៎ជាតិសាសន៍...........បាត់ពីភូមិសាស្ត្រ
....................ជ្រាបច្បាស់គ្រប់គ្នា។
៦.ឥល៉ូវដល់ខ្មែរ......ជិតដូចចាមដែរ.....................ដឹងទេជីវា ខ្មែរសម្លាប់ខ្មែរ...អនេកប្បការ...............ជឿតាមឃោសនា
..................មហាមិត្តខ្មែរ។
៧.ទុកខ្មែរចំនែញ.....បើដកខ្មែរចេញ........ទោម្នេញខ្លោចផ្សា ចាស់លោកព្រមាន....ទូន្មានដល់ខ្មែរ............ឈប់ហៅសាសន៍គេ
..................ខ្វៃខ្មែរប្រុសស្រី។
៨.សូមកុំជឿគេ......ត្រូវគិតរិះរេ.....................ជាតិខ្មែរទឹកដី បើខ្មែរស្លាប់ម្នាក់...ចាំជាក់ពិសី......................បរទេសកើនបី
..................យកដីខ្មែរអស់៕

ការងារជាប្រាក់

១.ខ្មែរគ្រប់អាត្មា...ត្រូវតែឧស្សាហ៍...........ធ្វើការរាល់ថ្ងៃ
ពុះពារឧបសគ្គ......ចាំជាក់ពិសី.................កុំឈរឱបដៃ
..................អ្នកថ្លៃវេទនា។
២.បើអ្នកខិតខំ.......អត្តាធាត់ធំ............ថ្កើងថ្កុំសោភា
ហើយមានភោគផល..ជួយដល់គ្រួសារ............ជួយជាតិខេមរា
..................សាសនាទៀតផង។
៣.កុំដេកចាំប្រាក់.....ត្រូវខំប្រចក្ស.............ចាំជាក់នួនល្អង
អ្នករពឹសដៃ........ឆ្អែតផ្ទៃពោះប៉ោង.......កុំធ្វើខុសឆ្គង
...................គន្លងមាត្រា។
៤.កុំខ្លាចនឿយហត់..ត្រូវចេះអត់ធ្មត់............លត់ដំកាយា
យូរទៅធ្លាប់ខ្លួន....ចេះក្បួនយល់ការ............តស៊ូពុំងារ
...................ការងារជាប្រាក់។
៥.មូលធនស្ដុកស្ដម្ភ..មានដោយសារខំ........សន្សំទុកដាក់
មិនដែលចាយវាយ......ខ្ជះខ្ជាយពូនពាក់.......គិតគូរជ្រៅរាក់
...................ល្អជាក់ទើបចាយ។
៦.អ្នកខ្ជិលច្រអូស...ច្រណែនថ្កោលទោស..កំហុសទាំងឡាយ
ស្អប់ពួកមូលធន......បន់ឱយអន្តរាយ.....ត្រង់ខ្លួនរាយមាយ
...................កាយឥតពាល់អី។
៧.ឃើញញាតិខិតខំ....អ្នកខ្ជិលសម្ងំ.............ចាំសុំគេឆី
សុំញយមិនឱយ.......តាំងធ្លោយសំដី........គេកំណាញ់ក្រៃ
..................កើតក្ដីគុំគួន។
៨.បើមិនឧស្សាហ៍....ចូរកុំឥស្សា...........គេណា៎មាសស្ងួន
ធ្វើបុណ្យលាងបាប....សូមជ្រាបនឹមនួន.......ធ្វើការខ្ជាប់ខ្ជួន
...................មាសស្ងួ​នសោភា៕

អ្នកមានគុណ

១.ភ្លៀងអ្នកម្ដាយរាំង..ថ្ងៃអាទិកំបាំង..ទំពាំងចាប់ភ្លុះ
ជួនម៉ែចង្អោរ..ក្អួតសោខ្លួនអស់...ជួនឃ្លានត្រីស្រស់
.................ពេងប៉ោះស្វាយខ្ចី។
២.អ្នកមេពពោះ....ពុកម៉ែរកឈ្មោះ....គិតប្រុសឬស្រី
ធ្វើអ្វីថែខ្លួន.......នឹកកូនក្នុងផ្ទៃ.......សុំសុខសិរី
/>.................សេចក្ដីប្រាថ្នា។
/>៣.សម្រាលបុត្រថ្លៃ..ម៉ែចុកចាប់ផ្ទៃ...ស្ទើរក្ស័យជីវា
/>កូនកើតចេញភ្លាម....ម៉ែឆ្ពាមហត្ថា..ទទួលបុត្រភ្ងា
/>..................ចិន្ដាប្រិមប្រិយ។
៤.កាលជាទារក..លោកថ្នមឥតល្អក់..បោកគក់រាល់ថ្ងៃ
បំពេរច្រៀងប្រប...ក្រសោបឱបបី.......ថែកូនប្រុសស្រី
..................ដោយក្ដីលំបាក។
៥.ទោះក្ដៅរងា..ស្រមោចសង្អារ..គ្មានជាឧបស័គ្គ
ពុកម៉ែអង់អាច....ឥតខ្លាចគ្រោះថ្នាក់..ដើម្បីវល្លកៈ
..................ស្មោះស្ម័គ្រការពារ។
៦.កិច្ចការស្រាលធ្ងន់..ពុកម៉ែរែកពុន...ទោះគ្រុនក្ដៅជា
/>ធ្វើ​ ដើម្បីកូន.......នឹមនួនស្ងួនភ្ងា........ចំណីអាហារ
..................ភោក្ដាឥតខ្វះ។
/>៧.កូនមានជម្ងឺ...ពុកម៉ែបម្រើ....ថែមើលប្ដូរប្លាស់
រកថ្នាំព្យាបាល.....ធូរស្រាលរហ័ស....ជួនម៉ែសំពះ
/>.................បន់ព្រះលោកជួយ។
៨.កូនរៀននិយាយ...ពុកម៉ែរីករាយ..សប្បាយភ្លេចព្រួយ
/>កូនហៅម៉ាក់ប៉ា.....ហាថាមួយៗ...ពុកម៉ែលើកស្ទួយ
/>.................ទាំងមួយទាំងពីរ។
/>៩.ពេលកូនរៀនដើរ..តេះតាស់ស្ទាក់ស្ទើរ..ដួលលើមេជី
លោកលើកកូនឈរ..សើចហ៊ោទាំងពីរ......កូនដើរវក់វី
/>.................គ្រប់ទីកន្លែង។
/>១០.រហូតកូនធំ...លោកបានអបរុំ...ឱយខំខ្នាស់ខ្នែង
ដល់កូនទៅរៀន..ទូន្មានប្រឹងប្រែង..ហើយព្រួយចំបែង
.................កូនក្មេងណាស់ស្ងួន។
១១.កូនរៀនថ្នាក់ខ្ពស់.លោកមានកិត្តិយស.ខ្ពង់ខ្ពស់សំសួន
ជួយអស់ប្រាក់កាស់...ច្រើនណាស់មាសស្ងួន.......ដើម្បីនឹមនួន
.................ជួយកូនថ្កើងថ្កាន។
១២.បើកូនធ្វើខុស...សូមលោកសន្ដោស..ទុក្ខទោសប៉ុន្មាន
ទោះអចេតនា......ប្រាថ្នាបំពាន...សូមលោកក្សេមក្សាន្ត
.................ក្នុងឋានលោកា។
១៣.កូនលោកស្រីប្រុស..ឱនកាយសុំទោស..កំហុសទោសា
ដែលបានធ្វើខុស.......ចំពោះមេបា.......ទាំងកាយវាចា
.................ចិន្ដាសព្វមុខ។
/>១៤.សូមបុណ្យកុសល..សិរីមង្គល...មានដល់ម៉ែពុក
បើមានជាតិក្រោយ..សូមឱយជួបមុខ..ម៉ែហើយនិងពុក
/>.................ទៅមុខទៀតអឺយ។
១៥.គុណលោកធំក្រៃ..លើកូនប្រុសស្រី..គ្មានអ្វីប្រៀបឡើយ
សូមអស់ទេវតា.....រក្សាលោកអឺយ...ជួយលោកដល់ត្រើយ
/>.................ឋានអើយនិព្វាន៕

ឧទ្ទិសជូន

១.សមិទ្ធិស្កឹមស្កៃ...រចនាឆ្លាក់ឆ្នៃ...ប្រិមប្រិយអស្ចារ្យ
សូមឧទ្ទិសជូន........ជីដូនជីតា........និងគ្រូបាចារ្យ
...................មេបាយើងខ្ញុំ។
២.គុណលោកធ្ងន់ក្រៃ..ប្រៀបដូចទឹកដី...មានផ្ទៃទូលំ
បានឱយកំណើត.......បង្កើតយើងខ្ញុំ...ចិញ្ចឹមអបរុំ
/>....................លុះធំសោភា។
៣.លោកបានស្លាប់ទៅ.កិត្តិយសលោកនៅ.យកដៅឆ្លាក់ចារ
នៅលើផ្ទាំងថ្ម.......បវរថ្លៃថ្លា......ឱយញាតកា
....................ទស្សនាចងចាំ។
៤.ស្ដេចខ្មែរសាងសង់...ប្រាសាទល្អខ្ញង់....គង់វង់ពាន់ឆ្នាំ
យើងខ្ញុំជាខ្មែរ.........ត្រូវតែចងចាំ.......យកតាមបំណាំ
.....................លំនាំព្រះអង្គ។
៥.ឃើញស្នាដៃហើយ...យើងមិនកន្តើយ..ស្ម័គ្រអឺយសាងសង់
ពីឈើឥដ្ឋថ្ម.........បាយអស៊ីម៉ង់ត៍......ប្រគេនព្រះសង្ឃ
....................សំណង់នេះណា៎។
៦.សូមវិញ្ញាណក្ខន្ធ..លោកបានទៅកាន់..ក្របខន្ធសាសនា
មានឋាននិព្វាន.........និងឋានទេវតា.......ឬឋានមនុស្សា
....................លោកានេះក្ដី៕