ស្ត្រីខ្មែរ

០១-កាលពីនៅតូចហៅកុម៉ារី      លុះធំពេញវ័យហៅកញ្ញា
ពេលចេះស្រឡាញ់ចេះស្នេហា    បានប្ដីរៀបការហៅលោកស្រី។
០២-ឯស្ត្រីខ្លះទៀតហៅជំទាវ      កាច់ឫករាងរៀវម្ញិកម្ញ៉ក់ក្រៃ
មានឈ្នួលបំរើផ្គាប់គុណថ្លៃ        ឥតចេះធ្វើអ្វីកិច្ចការផ្ទះ។
០៣-ឯលោកជំទាវខ្លះវិញទៀត​   ចរិយាមាយាទចិត្តមានះ
ជំរុញប្ដីឲ្យស៊ីប្រាក់កាស់​            ចិត្តលោភខ្លាំងណាស់ខុសផ្លូវធ៌ម។
០៤-ស៊ីលុយបានច្រើនឥតខ្វល់អ្វី  វិមានស្កឹមស្កៃល្អបវរ
មាសពេជរំលេចពេញដៃក          រថយន្តម៉ាកល្អតម្លៃខ្ពស់។
០៥-ជំទាវខ្លះទៀតចេះយកចិត្ត    អែបអបទូលពិតផ្អែមពិរោះ
ក្អែកមួយក្អែកដប់ប្រសប់ហួស    ដើម្បីសក្តិយសក្រុមគ្រួសារ។
០៦-បើជំទាវទាំងអស់ធ្វើបែបនេះ  អនាគតខ្មែរប្រេះឆាបែកគ្នា
អ្នកក្រច្រណែនខឹងផ្តន្ទា              ចោទលោកគ្រប់គ្នាបំផ្លាញជាតិ។
០៧-សូមលោកជំទាវទាំងអស់គិត  ហើយប្តូរគំនិត្យចិត្តមាយាទ
ជួយរាស្ត្រដែលក្រកុំបីឃ្លាត           ជៀសវាងពិឃាដខ្មែរដូចគ្នា។
០៨-ជំទាវត្រូវតែជួយជាតិយើង     ស្ត្រីដើមទ្រូងពើងប្រាំហត្ថណ៎ា
ដូចព្រះនាងលីវយីល្បីខ្លាំងក្លា       ដឹកនាំខេមរាការពារជាតិ។
០៩-ស្ត្រីខ្មែរខ្លះទៀតខឹងជេរប្ដី       ហាមឃាត់ប្រុសថ្លៃរឿងជួយជាតិ
ខ្លាចខាតលុយកាក់កម្លាំងទៀត     គិតថាជួយជាតិឥតបានការ។
១០-ពេលប្ដីឡើងធំតាំងកាច់ឫក    ឡើងធំពន្លឹកលើសប្តីរ៉ា
តាំងដូរសម្ដីចិត្តឫកពា                ជាអ្នកភារាខ្លួនអ្នកស្រែ។
១១-ដូច្នេះស្ត្រីខ្មែរត្រូវដឹងថា        ខ្មែរនៅស្ងៀមរ៉ា យូនរីកទ្វេ
លេបយកដីខ្មែរបានទទេ            ព្រោះអីអត់ខ្មែរប្រឆាំងវា។
១២-ខ្លះទៀតពូកែនិយាយដើម    ចាក់ចុចស្ទាត់ឆ្នើមរឿងឥតការ
ក្អែកមួយក្អែកដប់បញ្ជូនសារ       បានរឿងប្រេះឆាថោកទាបក្រៃ។
១៣-សូមឈប់អុចអាលនាំរឿងឈ្លោះ  រក្សាកិត្តិយសល្អប្រពៃ
រៀនតុបតែងផ្ទះអនាម័យ            រៀនធ្វើចំណីម្ហូបអាហារ។
១៤-បើឈ្លោះរឿងជាតិសមល្អពិត  ព្រោះចិត្តគំនិត្យគិតផ្លែកគ្នា
ឈ្លោះខាងសម្ដីវ័យប្រាជ្ញា            ដឹកនាំខេមរាសាងបុរី។
១៥-ស្ត្រីខ្លះទៀតគិតតែសប្បាយ   ឥតមានខ្វល់ខ្វាយរឿងជាតិអ្វី
គិតតែបៀប៉ោឧបាយអប្រិយ         ទាំងប្រពន្ធប្ដីស្រុះដៃគ្នា។
១៦-បើញៀនល្បែងហើយឥតខ្វល់ទេ  ដូចជាមាន់មេកាយពសុធា
កាយខ្ទេចកាយខ្ទីរកអាហារ             ធៀបស្ត្រីលែងបៀប៉ោរ៉ាល់ថ្ងៃ។
១៧-សូមកុំប្រព្រឹត្តិល្បែងបៀប៉ោ      លែងយូរអស់ខោគ្មានសល់អ្វី
បញ្ចាំមាសពេជប្រាក់ឧរៃ                ជួនលក់ទាំងដីលក់ទាំងកេរ្តិ៍។
១៨-សូមយកផ្លូវកណ្តាលមកប្រើ     ទាំងសព្វសារពើ​ ណ៎ារាស្ត្រខ្មែរ
កុំតឹងទៀងត្រង់រិះថាំទ្វេ                 កុំធូរវៀចវេរចាយខ្ជះខ្ជាយ។
១៩-កាលមុនស្ត្រីខ្មែរដឹកនាំជាតិ     ការពាររាស្ត្រទៀតផុតភយ្តរាយ
ដេញខ្មាំងឈ្លានពានឲ្យខ្ចាត់ខ្ចាយ   ឥតខ្លាចខ្វល់ខ្វាយច្បាំងតទល់។
២០-ឥឡូវស្ត្រីខ្មែរបែរទន់ខ្សោយ     នាំគ្នាបណ្តោយធូរតាមខ្យល់
ឥតប្រឹងពុះពារទប់តទល់               យកសិទ្ធិសាកលស្ត្រីស្មើប្រុស។
២១-ដូច្នេះស្ត្រីខ្មែរត្រូវក្រោកឡើង    ពាក្យថាទ្រូងពើងអ្នកចាំចុះ
ចូលធ្វើនយោបាយដូចបុរស          ឲ្យមានសព្ទយសឈ្មោះស្ត្រីខ្មែរ។
២២-ទាមទារឲ្យមានសិទ្ធសត្រី       សិទ្ធស្មើប្រុសស្រីថ្លៃមាសមេ
មានភាតរភាពសេរីភាពដែរ          សមភាពរាស្ត្រខ្មែរស្រីនិងប្រុស៕
​​​​​​​​​​​​​​​​                                                                      ១៩៨៧​ ផ.រ.

 

និទាឃៈរដូវ

០១.រដូវត្រជាក់..គឺសិសិរៈ..ហើយធ្លាក់ដល់នូវ
រដូវអ្វីអ្នក..និទាឃៈដឹងទៅ..ចាប់មានកំដៅ
...........ទៅលើពសុធា។
០២.Printempsដល់ហើយ..មានរស្មីហើយ..ធូរស្បើយគ្រប់គ្នា
ធម្មជាតិរូតរះ..យកឈ្នះរងា..ហើយចេញចេស្ដា
.............គ្រប់ណ៎ាទិសទី។
០៣.និទាឃៈរដូវ..រស្មីកំដៅ..ទៅលើប្រឹថពី
ធ្វើឲ្យធញ្ញជាតិ..ឆ្លៀតលូតសែនទ្វី..និងអដវី
.................លូតមីរដែរណ៎ា។
០៤.រដូវនិទាឃៈ..ក្នុងខែអីអ្នក..ចាំជាក់ខេមរា
ចាប់ពីទីម្ភៃ..នៃខែមីនា..ដល់ខែឧសភា
............ទីណ៎ាម្ភៃមួយ។
០៥.រុក្ខជាតិរីកស្រស់..ប្រជាទាំងអស់..ស្រស់បោះអស់ព្រួយ
ភក្ត្រក៏រីករាយ..សប្បាយណាស់មួយៗ..បានរស្មីជួយ
.............លើកស្ទួយជីវិត។
០៦.រុក្ខជាតិផ្កាផ្លែ..ពេញចំការស្រែ..មីរដេរដាស់ពិត
សត្វស្លាបតូចធំ..ហ្វូងឃ្មុំសត្វល្អិត..ហិចហើរជុំជិត
.................បឺតលិឍជីវជាតិ។

Printemps អានថា " ប្រាំងតង់ស៍ " ជាភាសាបារាំងប្រែថា និទាឃៈ
សែនទ្វី ប្រែថា​ទ្វេឡើង
អដវី អានថា អៈដៈវី ប្រែថា ព្រៃធំ

វស្សានរដូវ

០១.វស្សានរដូវ..តពីរដូវ..អ្វីទៅផៅញាតិ
តពីនិទាឃៈ..រុក្ខលាស់ព្រាត..ចូលវស្សានទៀត
...........ធម្មជាតិលាស់ខ្ចី។
០២.វស្សានរដូវ..ភ្លៀងច្រើនពេកកូវ..លេចផ្លូវស្រែព្រៃ
រដូវកាប់គាស់..ភ្ជួររាស់ជ្រោយដី..ដកស្ទូងញាប់ដៃ
............រាល់ថ្ងៃផងណ៎ា។
០៣.L'étéកល្យាណ..ប្រែថាវស្សាន..គ្រប់ប្រាណជ្រាបរ៉ា
ពីទីម្ភៃពីរ..នៃខែឧសភា..ដល់ខែកញ្ញា
..........ទីម្ភៃពីរដែរ។
០៤.វស្សានរុក្ខជាតិ..ផ្កាផ្លែព្រោងព្រាត..ខ្លះទៀតគ្មានផ្លែ
ស្លឹកបៃតងខ្ចី..ពេញព្រៃវាលស្រែ..មនោរម្យម៉្លេះទេ
..............l'été បវរ។
០៥.ពីរពាន់ដប់មួយ..ឆ្នាំនេះខ្មែរព្រួយ..ពេញមួយនគរ
ដោយទឹកជំនន់..ជន់លេចស្ទឹងអូរ..លេចស្រូវងាប់គរ
..............ងាប់គោក្របី។
០៦.រាស្ត្រវិញក៏ត្រូវ..ជួបផលអាស្រូវ..ខ្លះត្រូវក្សិណក្ស័យ
ផ្ទះក៏បាក់បែក..ហើយរែកទុក្ខភ័យ..ខ្លោចផ្សាណាស់ថ្លៃ
.............កម្មអីម៉្លេះទេ។
០៧.សូមឥន្ទទេវតា..ជួយថែរក្សា..ខេមរារាស្ត្រខ្មែរ
ដែលមានអាសន្ន..ទឹកជន់លេចស្រែ..ឲ្យឆាប់ស្រកទ្វេ
................ជៀសដែរទុក្ខភ័យ៕

L'été អានថា​ " លេតេ " ជាភាសាបារាំងប្រែថា វស្សាន

ហេមន្តរដូវ

០១.ព្រលប់ត្រជាក់..មានសន្សើមធ្លាក់..ពូនពាក់ជោកដី
ជោកស្មៅស្លឹកឈើ..នៅលើព្រឹក្សព្រៃ..ជារដូវអ្វី
.....................អ្នកថ្លៃដឹងទេ។
០២.គឺជារដូវ..ហេមន្តរដូវ..ចាំទៅកូនខ្មែរ
យប់ចាប់ត្រជាក់..ភ្លៀងធ្លាក់ញឹកដែរ..ផ្សិតក៏ដុះទ្វេ
...............ជ្រាបទេខេមរា។
០៣.ព្រលប់មកដល់..ទោះជាមានខ្យល់..បក់វល់វេហា
ឬឥតវាយោ..បក់មកទេណា..ក៏ធាតុរងា
............តាមជាមិត្តផង។
០៤.ស្លឹកឈើប្រែពណ៌..ពីបៃតងល្អ..មកពណ៌លឿងម្ដង
ហើយក៏ចាប់ជ្រុះ..ក្រាលសុះដីផង..ឲ្យញាតិប្អូនបង
.............សៅហ្មងចិន្ដា។
០៥.ស្លឹកឈើលឿងទុំ..ពាស់វាលតូចធំ..ពេញភ្នំព្រឹក្សា
ប្រៀបដូចភ្លើងឆេះ..សម្លេះរុក្ខា..នេះហើយចេស្ដា
..................ហេមន្តសម័យ។
០៦.SAISON AUTOMNE..ដល់ខែដែលកូន..បងប្អូនប្រុសស្រី
សែនជូនដូនតា..មេបាអ្នកថ្លៃ..ដែលចាកលោកិយ
.............សុំក្ដីសុខា។
០៧.ហេមន្តសម័យ..ចាប់ពីម្ភៃបី..នៃខែកញ្ញា
ដល់ថ្ងៃម្ភៃមួយ..នៃខែធ្នូរ៉ា..សូមជ្រាបប្រជា
...............គ្រប់គ្នាទៅអឺយ៕

SAISON អានថា​ " សេហ្សុង​ " ជាភាសាបារាំង ប្រែថា រដូវ
AUTOMNE អានថា " អូតូន " ជាភាសាបារាំង ប្រែថា ហេមន្ត

សិសិររដូវ

០១.សិសិររដូវ..តពីរដូវ..អ្វីទៅអ្នកអ្ហើយ
រដូវសន្សើម..ធ្លាក់សើមដីអឺយ..ហេមន្តលោកអឺយ
............ចំលើយត្រូវណ៎ា។
០២.សិសិររដូវ..មានធ្លាក់ The Snow..ចាំទៅខេមរា
ចាប់ពីថ្ងៃទី..ម្ភៃពីរធ្នូរ៉ា..ដល់ខែមិនា
............ទីដប់ប្រាំបួន។
០៣.HIVERប្រែថា..សិសិរៈរ៉ា..ចាំណាមាសស្ងួន
មានទឹកកកធ្លាក់..ត្រជាក់ញ័រខ្លូន..ស្លៀកពាក់មាំមួន
................អាវបូនជាន់ផង។
០៤.ពេលទឹកកកធ្លាក់..ហើយកករឹងជាក់..ត្រជាក់កន្លង
ជួនខ្យល់ល្ហៀកៗ..ត្រចៀកដៃផង..ឈឺស្ពឹកស្រៀវស្រង
..................ប្អូនបងជ្រាបទៅ។
០៥.ខោអាវធាតុLAINE..ក្រណាត់ល្អមែន..ហើយសែនកក់ក្ដៅ
ធាតុLAINEការពារ..រងាជ្រាបទៅ..ពេលអ្នកចេញក្រៅ
.................ពាក់ទៅសង្ហារ។
០៦.ប្រជាអឺរ៉ុប..ជាវអាវប្រើគ្រប់..ជួយទប់រងា
ពេលគេចេញក្រៅ..ដើរទៅធ្វើការ..កក់ក្ដៅអស្ចារ្យ
................ខេមរាជ្រាបទៅ៕

HIVER អានថា" អ៊ីវា " ជាភាសាបារាំង ប្រែថា សិសិរឬសិសិរៈ ជារដូវត្រជាក់
THE SNOW អានថា​" ដឺស្នូវ " ជាភាសាអង់ក្លេស៍ ប្រែថា ទឹកកក

បឋវី

០១.វសុមតី..........ធំមូលមានផ្ទៃ.......... ទឹកដីទូលំ
រីផ្ទៃសមុទ្រ..........ធំផុតលើសភ្នំ............រួមទាំងវាលធំ
..................និងភ្នំវាលិកា។
០២.បឋវីវិល.........ជុំវិញ ITSELF​(អ៊ិតសិល)...ប្រើ ពេលវេលា
មួយថ្ងៃទើបជុំ........ខ្លួនមុំពសុធា...........សូមជ្រាបញាតកា
..................ខេមរាប្រុសស្រី។
០៣.បឋវីធំ..........មានផ្ទៃទូលំ............វិលជុំ​ SOLEIL(សូឡី)
អស់ពេលបីរយ.......ហុកសិបប្រាំថ្ងៃ..........មួយឆ្នាំនោះអី
..................ជ្រាបវ៉ីស្ងួនភ្ងារ។
០៤.លើបឋវី.......... គឺមានប្រថពី............គិរីព្រឹក្សា
សមុទ្រតូចធំ.........វាលភ្នំពាលុកា...........ម្រឹកនិងមច្ឆា
.................បក្សាបក្សី។
០៥.លើ ពសុធា......មានទ្វីបប្រាំណ៎ា.........មួយអាហ្រ្វិកវ៉ី
ពីរអាមេរិក..........អឺរ៉ុបទីបី.................បួនអាស៊ីនោះអី
.................ប្រាំអូស្រ្តាលី។
០៦.អាមេរិកឡាទីន....ទ្វីបនេះធំមែន............ព្រំដែនធរណី
នៅជុំវិញទ្វីប.......សុទ្ធតែជលធី............មើលលើផែនទី
..................ធំវែងអន្លាយ។
០៧.រីទ្វីបអឺរ៉ុប.......ដីគ្របដណ្ដប់............ព្រំចប់សែនឆ្ងាយ
មានទេសរុស្ស៊ី.......ដែនទីលាតឆ្ងាយ.........ធំវែងអន្លាយ
..................គ្រប់កាយជ្រាបរ៉ា។
០៨.អឺរ៉ុបអាស៊ី........ព្រំដែនទ្វីបពីរ............ប្រថពីជាប់គ្នា
ជាប់តែភូមិសាស្រ្ត.....ជាតិសាសន៍ប្រជា.........ព៌ណស្បែកប្លែកគ្នា
..................គ្រប់គ្នាជ្រាបផង។
០៩.ប្រជា ASIA......ស្បែកលឿងទេណ៎ា.....ញាតកាដឹងផង
អឺរ៉ុបស្បែកស........ស្អាតល្អហ្មត់ហ្មង.......ច្រមុះស្រួចផង
..................ប្អូនបងឃើញទេ។
១០.អាហ្រ្វិកស្បែកខ្មៅ...មាឌធំស្រឡៅ........ជ្រាបទៅញាតិខ្មែរ
ទ្វីបនេះក៏ធំ..........ជុំវិញសុទ្ធតែ​..............សមុទ្រធំទ្វេ
...................ស្គាល់ទេប្រជា។
១១.មួយឆ្នាំគឹតទៅ....មានបួនរដូវ..............នៅលើពសុធា
មួយនិទាឃៈ...........ពីរវស្សានៈរ៉ា............បីហេមន្តណ៎ា
...................ចត្វាសិសិរៈ។
១២.និទាឃៈរដូវ........អាកាសធាតុក្ដៅ.........ចាំទៅលោកអ្នក
ខែចេត្រក្ដៅខ្លាំង....ស្ងួតរាំងភ្លៀងជាក់......បែកញើសខ្ជោកខ្ជាក
....................សើមឃ្លៀកគ្រប់គ្នា។
១៣.វស្សានរដូវ.......ភ្លៀងច្រើនពេកកូវ........លិចផ្លូវទីធ្លា
កើតទឹកជំនន់............ជោរជន់ហូរហៀរ.......លិចភូមិភារា
....................ប្រជាខ្លាចភ័យ។
១៤.ហេមន្តរដូវ........សន្សើមធ្លាក់នៅ........ជោកផ្លូវព្រឹក្សព្រៃ
សន្សើមធ្លាក់គ្រប់......ព្រលប់រាត្រី...............ជោកស្មៅសើមដី
....................ស្នាដៃហេមន្ត។
១៥.សិសិររដូវ.........ធ្លាក់​ NEIGE(ណែហ្ស)ឬ SNOW(ស្នូវ)...ពេញផ្លូវរថយន្ត
ធ្លាក់គ្របគិរី..........គ្រប់ទីតំបន់...............ត្រជាក់ពេកពន់
....................ទឹកមន្តសិសិរៈ។
១៦.ទ្វីបអង់តាកទិក.....ផ្ទុយពីអាកទិក............កុំភ្លេចលោកអ្នក
អាកទិកហៅប៉ូល.......ខាងជើងចាំជាក់............ប៉ូលត្បូងវិញអ្នក
....................ហៅអង់តាកទិក។
១៧.ប៉ូលត្បូងសម្បូរ......ទឹកកកហៀរហូរ.........កកគរជានិច្ច
មានថនិកសត្វ.........និងថលជលិក............ហើយនិងបុគ្គលិក
....................SCIENTIFIQUE(ស្យង់ទីហ្វិក) ប៉ុណ្ណោះ៕
ផ.រ.

វាលិកា ឬ ពាលុកា ប្រែថា ខ្សាច់
ITSELF អានថា អ៊ិតសិល ជាភាសាអង់ក្លេស​​ ប្រែថា​ ខ្លួនវា​ ឬ ខ្លួនឯង
SOLEIL អានថា​ សូឡី ជាភាសាបារាំង ប្រែថា ព្រះអាទិត្យ
បឋវី បៈឋៈវី ឬ វសុមតី វៈសុមៈតី ឬ ពសុធា ប្រែថា ផែនដី
NEIGE អានថា​ ណែហ្ស ជាភាសាបារាំង ប្រែថា ទឹកកក
SNOW អានថា ស្នូវ ជាភាសាអង់ក្លេស ប្រែថា ទឹកកក
ថនិកសត្វ អានថា ថៈនិកសត្វ ប្រែថា​ សត្វចិញ្ចឹមកូនដោយទឹកដោះ
ថលជលិក អានថា​ ថៈលៈជៈលិក ប្រែថា សត្វរស់នៅលើគោកនិងក្នុងទឹកផង
ដូចជាកង្កែប ជាដើម
SCIENTIFIQUE អានថា ស្យង់ទីហ្វិក ជាភាសាបារាំង ប្រែថា អ្នកស្រាវជ្រាវ
ទទឹងផែនដី​ត្រង់ខ្សែ អេក្វាត័រ (équateur) ប្រវែង 12756 KM
ទទឹងផែនដីត្រង់ប៉ូលខាងជើង ប៉ូលខាងត្បូង ប្រវែង 12713 KM
បរិវេណផែនដី 40053,84 KM
ទំហំផ្ទៃផែនដី មាន 510 101 000 KM2
ផែនដីមានចំណុះ 1 08 33 20 00 00 00 KM3
ផែនដីមានទម្ងន់ 60 00 00 00 00 00 00 00 00 00 00 Tonnes

សុរិយគតិ

០១.មួយឆ្នាំគឹតទៅ.......មានបួនរដូវ......ចាំទៅលោកអ្នក
មួយនិទាឃៈ..............ពីរវស្សានៈ.......បីហេមន្ត{មន់តៈ}
.......................បួនសិសិរណា។
០២.និទាឃៈរដូវ...........អាកាសធាតុក្ដៅ....ចាំទៅញាតកា
ចាប់ពីថ្ងៃទី..............ម្ភៃខែមិនា.............ដល់មិថុនា
.......................ទីម្ភៃមួយរ៉ា។
០៣.វស្សានរដូវ..........ភ្លៀងច្រើនពេកកូវ..លេចផ្លូវយាត្រា
ចាប់ពីថ្ងៃទី..............ម្ភៃពីរមិថុនា.........ដល់ខែកញ្ញា
.......................ទីម្ភៃពីរដែរ។
០៤.ហេមន្តរដូវ..........សន្សើម ជោកស្មៅ..ជោកផ្លូវដីស្រែ
ពីទីម្ភៃបី..............កញ្ញាខែខ្មែរ.........ដល់ម្ភៃមួយខែ
......................ធ្នូណាជ្រាបទៅ។
០៥.រដូវសិសិរៈ...........យប់ថ្ងៃត្រជាក់...មានធ្លាក់ THE SNOW
ចាប់ពីថ្ងៃទី..............ម្ភៃពីរធ្នូទៅ...........រហូតដល់នូវ
......................ដប់ប្រាំបួនមិនា។
០៦.ទ្វីប OCEANIE........រដូវផ្ទុយពី.............អាស៊ីដែរណា
ផ្ទុយពីអឺរ៉ុប..............និងអាមេរិកា............ប៉ែកខាងជើងរ៉ា
.......................ឧបមាជូនអ្នក។
០៧.នៅ OCEANIE.......ក្ដៅខ្លោចប្រថពី.....អាស៊ីត្រជាក់
អាមេរិក អឺរ៉ុប.............ថ្ងៃយប់ត្រជាក់..ហើយមាន SNOW ធ្លាក់
.......................ពូនពាក់លើដី។
០៨.បឋវីវិល.............ជុំវិញ ITSELF.......ប្រើពេលមួយថ្ងៃ
គឺ VINGT QUATRE HEURES.. ONE YEAR ផែនដី.......វិលជុំ SOLEIL
......................បានវ៉ីមួយជុំ។
០៩.វសុមតី.............មានទឹកនិងដី...........មានផ្ទៃទូលំ
មានទន្លេស្ទឹង.........និងសមុទ្រធំ..........មានជ្រោះព្រៃភ្នំ
.....................វាលធំភ្នំខ្សាច់៕
បឋវី អាន បៈឋៈវី ឬ វសុមតី​ អាន​ វៈសុមៈតី ឬ ពសុធា = ផែនដីទាំងមូល
SNOW ស្នូវ (ជាភាសាអង់ក្លេស) = ទឹកកក
VINGT QUATRE HEURES វ៉ាំង កាត្រ អឿរ៍ ឫ វ៉ាំង កាត្រត្រឿរ៍(ជាភាសាបារាំង)= ២៤​ម៉ោង
ITSELF អ៊ិតសិលហ៍្វ​ (ជាភាសាអង់ក្លេស) = ខ្លួនឯង ឬ ខ្លួនវា
ONE YEAR វ៉ួន យឿ​ (ជាភាសាអង់ក្លេស) = មួយឆ្នាំ
SOLEIL សូឡី (ជាភាសាបារាំង) = ព្រះអាទិត្យ


ផ.រ.