ហេមន្តរដូវ

០១.ព្រលប់ត្រជាក់..មានសន្សើមធ្លាក់..ពូនពាក់ជោកដី
ជោកស្មៅស្លឹកឈើ..នៅលើព្រឹក្សព្រៃ..ជារដូវអ្វី
.....................អ្នកថ្លៃដឹងទេ។
០២.គឺជារដូវ..ហេមន្តរដូវ..ចាំទៅកូនខ្មែរ
យប់ចាប់ត្រជាក់..ភ្លៀងធ្លាក់ញឹកដែរ..ផ្សិតក៏ដុះទ្វេ
...............ជ្រាបទេខេមរា។
០៣.ព្រលប់មកដល់..ទោះជាមានខ្យល់..បក់វល់វេហា
ឬឥតវាយោ..បក់មកទេណា..ក៏ធាតុរងា
............តាមជាមិត្តផង។
០៤.ស្លឹកឈើប្រែពណ៌..ពីបៃតងល្អ..មកពណ៌លឿងម្ដង
ហើយក៏ចាប់ជ្រុះ..ក្រាលសុះដីផង..ឲ្យញាតិប្អូនបង
.............សៅហ្មងចិន្ដា។
០៥.ស្លឹកឈើលឿងទុំ..ពាស់វាលតូចធំ..ពេញភ្នំព្រឹក្សា
ប្រៀបដូចភ្លើងឆេះ..សម្លេះរុក្ខា..នេះហើយចេស្ដា
..................ហេមន្តសម័យ។
០៦.SAISON AUTOMNE..ដល់ខែដែលកូន..បងប្អូនប្រុសស្រី
សែនជូនដូនតា..មេបាអ្នកថ្លៃ..ដែលចាកលោកិយ
.............សុំក្ដីសុខា។
០៧.ហេមន្តសម័យ..ចាប់ពីម្ភៃបី..នៃខែកញ្ញា
ដល់ថ្ងៃម្ភៃមួយ..នៃខែធ្នូរ៉ា..សូមជ្រាបប្រជា
...............គ្រប់គ្នាទៅអឺយ៕

SAISON អានថា​ " សេហ្សុង​ " ជាភាសាបារាំង ប្រែថា រដូវ
AUTOMNE អានថា " អូតូន " ជាភាសាបារាំង ប្រែថា ហេមន្ត